اقرأ في هذا العدد
 
 




سوالف
 
تاريخ ميلادي
تاريخ ميلادي
 
شريف سعود

اسولفلكم اليوم شلون عرفت تاريخ ميلادي: 
هاي يمعزوزين سنة 72 جنت بصف الثاني باء بمدرسة المنصور  (منصور الاهوار مو منصور بغداد) المدير صاحني كَال ولك الأُميلح صح انت شاطر وابوك من معارفنا بس مو معناها اخليك سنتين بالمدرسة وانت بلاية جنسية.. روح كَل لابوك خلي يطلعلك وحدة (جنسية).  
رحت ركض لابوي عبالك واحد ميت من كرايبنا وجاي ابلغه, طكَله صفنة, وكَال باجر يصير خير, اجه باجر حطني بالمشحوف آنه وأمي (تالي عرفت ليش جاب أمي ويانه) ودفع 6 كيلو مترات, (ماجان اكو سيارات عدنا بذاك الوكت) كَول وصلنا لدائرة النفوس, تباوعلي الموظف بنص عين وسأل أبوي: شنو هذا؟ كَاله أبني غير، كَاله يا مواليد التحفة؟ أبوي هنا تلايم ظل لاياخذ ولايطّي, طلع لأمي الكَاعدة برا. كَالها يكَول الموظف ابنج يامواليد؟ كَالتله شلقضية جا نسيت غير صار بالشتا؟ طفر عليها.. ولج شلون بالشتا انه اذكر صار بالصيف, كَالتله حبيب ئلبي لا بالشتا (بدل حبيب ئلبي خلوا غير شي, يابيرغ الشرجية مثلا) راجع معلوماتك هو هم كَالها أنتي راجعي معلوماتج.. صارت ضغبرة, بهالاثناء آنه طلّعت قلم رصاص من جيبي ووريقة عركَانة وكَتلهم صيحوا على جايات وخلي نتفاهم اولا: ياسنة ولدت؟.. على ما اجت الجايات صفينا على معلومة : داير حول على قتلة الزعيم, الزعيم انقتل 1963 ودار حوله يعني 1964 ..موش؟ هاي كَضينا منها.
خاطوا الاستكانات ورشفة واحدة, امي كَالت ايه صدكَ بالصيف بس موش كلش, جانت بأوله وجان الشلب كَصيل, بموسم الشِلاع, جا خوش يعني ايار لو حزيران وأبوي هنا نبش اذنه باصبعه, كَال.. أيه أيه (عود مثل نيوتن من صاح وجدتها) كَالها انتي مو جبتيه بالمستشفى الجمهوري؟ كَالتله ايه صددددكَ يسعود, واذكر من خليتني اطلكَ بشريّف ورحت للمظاهرة !!! (هلو عيني تعال إعرف يامظاهرة بذاك التاريخ؟) جيب الليف ودّي الليف وبعد ان تدخل المؤرخون المراجعون صار معلوم ماكو مظاهرة بذيج السنة (هو اكو ابن منتوف يتظاهر والحرس القومي موجود؟) عصرت ادمغتها العالم, ابو الجايات ينكَل بصواني الاستكانات للمشاركين في الأرخنة (أو التأرخة) على حساب الوالد, أخيرا توصلوا لنتيجة: ماكو مظاهرة بذاك التاريخ المحصور بشهرين غير الأول من آيار عيد العمال العالمي, والأخ عاف مرته تطلكَ بالمستشفى وراح يشارك بالعيد باعتباره من الطبقة الكادحة كعامل في( س ح ج ع ).. كَللوش ثبتها ابو النفوس, بس الخبيث كَال لابوي اذا مولود بالمستشفى ليش ماعنده بيان ولادة؟ هنا ابوي اشتغلت ذاكرته كَاله مو احنه صار عدنا تهاون وبعد شهرين رحنا كَالوا احتركَ المستشفى وراحت الأوليات والتاليات !!!.